Covid-19: Franca një nga vendet më të vaksinuara në botë

Pasi Presidenti amerikan Joe Biden parashtroi një plan për të trajtuar pandeminë në Amerikë me një sërë rregullash të reja të vaksinimit javën e kaluar, pyetja në mendjen e shumë personave ishte: A do të funksionojë mandatimi i vaksinave?

Përtej Atlantikut, në Francë, pavarësisht nga fillimi i ngadalshëm i vaksinimit në fillim të këtij viti, i nxitur nga çështjet e furnizimit, që kulmuan në një betejë të madhe publike me AstraZeneca mbi mungesat e vaksinave dhe shqetësimeve të mpiksjes së gjakut, Franca më në fund filloi programin e saj në pranverë. Deri në maj, vendi arriti qëllimin e tij për të vaksinuar pjesërisht 20 milionë persona - 30% të popullsisë.

Në korrik, me normën e vaksinimit të Francës në stanjacion dhe rastet e koronavirusit në rritje, Presidenti francez Emmanuel Macron vendosi kërkesa gjithëpërfshirëse të vaksinimit për pjesën më të madhe të jetës së përditshme. “Që nga 1 gushti, çdokush pa një ‘dëshmi shëndetësore’, që tregon statusin e vaksinimit ose një test negative nuk do të ishte në gjendje të hynte në bare dhe kafene, ose të udhëtojë në distanca të gjata me tren”, deklaroi Macron. Punonjësit e stafit të kujdesit shëndetësor, një grup prej afërsisht 2,7 milionë persona në Francë, të cilët nuk vaksinohen deri ditën e Mërkurë do të përballen me pushimin nga puna ose pezullimin pa pagesë.

Lëvizja e Macron ishte një rrezik i llogaritur në një vend, ku një besim i thellë kulturor në liritë individuale dhe një mosbesim ndaj qeverisë është shfaqur në hezitimin e vaksinave. Përkundër historisë së saj si djepi i shkencës së vaksinave, në Francë ndodhen edhe gjigantët farmaceutikë Sanofi dhe Instituti Pasteur, në nder të Louis Pasteur, një nga themeluesit e vaksinimit modern. Një sondazh i Wellcome Global Monitor i publikuar në vitin 2019 zbuloi se një në tre francezë nuk ishte dakord se vaksinat ishin të sigurta, më tepër se çdo vend tjetër nga 144 të anketuar.